මොරටුව වේල්ස් කුමරි විදුහල සහ කොළඹ යශෝධරා බාලිකා විදුහල අතර ප්‍රථම වරට පැවැත්වෙන වාර්ෂික මහා ක්‍රිකට් තරගය ‘Battle of the Golden Queens’ හෙට (31) මොරටුව ද සොයිසා ක්‍රීඩාංගණයේදී පැවැත්වේ.
අවුරුදු 19න් පහළ ජාතික කාන්තා ක්‍රිකට් කණ්ඩායමේ නායිකාව ලෙස කටයුතු කරන මනුදි නානායක්කාරගේ නායකත්වයෙන් වේල්ස් කුමරි පිල තරගයට එක්වන අතර, උපනායිකාව ලෙස විශ්මි සොයිසා කටයුතු කරයි. කණ්ඩායමේ පුහුණුකාරිනිය වන්නේ ජාතික කාන්තා ක්‍රිකට් කණ්ඩායමේ හිටපු ක්‍රීඩිකාවක වන හිරුකා ප්‍රනාන්දුය.
විභුෂා වික්‍රමආරච්චිගේ නායකත්වයෙන් යශෝධරා විදුහල තරගයට එක් වන අතර, උපනායිකාව ලෙස සියත්‍රා රණසිංහ කටයුතු කරයි. කණ්ඩායමේ පුහුණුකරු ලෙස සහන් දේශප්‍රිය මහතා කටයුතු කරයි.
මේ විදුහල් මින් පෙර තරග පැවැත්වුවත් දෙපිල මහා තරගයකදී එක්වන පළමු අවස්ථාව මෙයයි.
වේල්ස් කුමරි විදුහල්පතිනි තිළිණි විජේවීර සහ යශෝදරා බාලිකා විදුහලේ විදුහල්පතිනි නිලුකා සමන්කුමාරි මහත්මීන්ගේ උපදෙස් සහ මඟ පෙන්වීම යටතේ සංවිධාන කරන මේ තරගය වාර්ෂිකව පැවැත්වීමට සැලසුම් කර තිබේ. පාසල් දෙකෙහි මිත්‍රත්වය ගොඩනඟා ගැනීමටත්, යොවුන් දැරියන්ට දක්ෂතා එළිදැක්වීමට මෙය අගනා අවස්ථාවක් බවත් විදුහල් දෙකෙහි විදුහල්පතිනියෝ පවසති.
